Hallo mitenand, ich bin de Finn. Am Sunntig 04.12.2022 bin ich im Spital Uster uf d Wält cho. Mir häts sehr guet gfalle, im Buch vom Mami, drum hanich mir au e Wuche länger Ziit la wie plant. Scho am Samstig hanich aber am Mami agfange zeige, dass ich gern wür usecho. Am Sunntig Morge früe, am halbi Vieri sind s Mami und de Papi denn au in Spital gfahre.
So richtig usecho hanich den aber glich nanig wele. Will mis Härzli aber bü jedere Wehe chli langsamer gschlage hät, händs mich den miteme Kaiserschnitt usegholt.
Am 11:50 isches denn sowit gsi und ich bin uf de Wält gsi. Als ersts händs den mitem Papi zäme gluegt, wie gross dasi bin. Ich bin 3580 g, 49 cm und han en Chopfumfang vo 36 cm gha. Scho im Operationssaal hani den defe zum Mami go kuschle. Am liebste heti au gad scho öpis trunke. Wills aber nöd so vill platz gha hät, hämmer nochli müsse warte. Zrugg im Gebärsaal hani den aber die erste Schlückli chöne nää.
Nachdem ich ganz lang han däfe mitem Mami schmuuse, bini nacher no zum Papi go kuschle. Mir sind den gad beidi mitenand ipfuset.