Mini Eltere sind de Pudi und d Dän und sits mich git, simer e chlini Familie.
Zäme mitem Mami und em Papi erläbi vill und dun jede Tag kuschle und spiele.
Min Papi
Di allermeiste lüt säged mim Papi Pudi. Eigentlich heisster aber Patrick. De Papi schafft als Treuhänder ganz näch vo eus dihei. Drum gsenichen au vill am Mittag. Mängisch musser aber au uf Züri, willer no im Kantonsrat isch. Wenn er den z Abig hei chunt dümmer amel als Famile z Nacht ässe. Wickle duet er mich nöd so gern, defür dümmer immer zäme bädele. Bädele duni mega gern, ich finds nur blöd, dases nacher immer so chalt isch. Das ich den wider ganz warm überchume, dümmer fest kuschle!
Mis Mami
Mim Mami säged di meiste Dän oder Daniela. Aktuell bliebt si de ganzi Tag bi mir diheime und luegt dases mir guet gaht. Mir gönd jede Tag go spatziere und dünd vill mitenand spile und kuschlä. Wänn ich den bizli grösser bin, gaht si wider zwei Täg als Hochbauzeichnerin go schaffe. Den dünd s Grossmami und s Gotti abwächsligswis uf mich ufpasse.