Am 06.12.2022, wonich gadmal zwei Tag alt gsi bin, hani s erstmal a die frisch Luft döfe. S Mami hät mit mir en Spaziergang gmacht. Die ersti richtigi Reis hanich den aber am 08.12.2022 gmacht, det bini mitem Mami und Papi heigfahre. Diheime gfallts mer aso sehr guet. Am liebste liggi ufem Wickeltisch oder uf minnere Spieldecki, wenni nöd gad mitem Papi oder em Mami am kuschle bin.
Am 11.12.2022 hämmer den de ersti Usflug gmacht. Mer sind zum Michi und de Sarah hei und händ det kläuslet.
S erstmal Bädelet hani am 12.12.2022. Das isch aso mega öpis lässigs.
Will ich scho gli s erstmal Wiehnachte fiire wird, simmer am 17.12.2022 go en Christbaum sueche. Det simmer au s ersmal imene Resti go Zmittagässe. S Mami hät bsunders freud gha, dass sie wieder hät defe es Tatar ässe.
Wiehnachte sind den aso sträng gsi, mer sind vo eim Fäscht as nächste. Am 22.12.2022 hämmer mit de Tschona und em Oli bü eus diheime gfiiret. Am 24.12.2022 simmer den zersch zum Grossmueti hei go Lasagne ässe und nacher no zude Ingrid en Dessert go schnabuliere. Am 25.12.2022 häts den bim Grossätti no Fondue-Chinoise gää. I Däne Täg hanich au s erstmal min Chopf chöne sälber hebe und han afange mini Häärli z verlüüre.
Min erste Silväster hämmer ide Waldmannsburg gfiiret. D Füürwärch händ mich garnöd gstört, ich han nämlich friedlich pfüselet.
Am 06.01.2023 hanich den s erstmal mis Mami aglächlet, läck hät si freud gha. Sit do machi das aso regelmässig. Am gliche Abig sind s Mami und de Papi au s erstmal furt gange. Drum isch s Grossmami verbicho zum uf mich ufpasse. Dä Schoppe hani aso bis uf de letschti Tropfe ustrunke.
Will ich so guet pfuuse, schlaf ich sit em 07.01.2023 i mim eignige Zimmer. Det gfalltsmer sehr guet.
Am 21.01.2023 hät den s erstmal s Grossmueti uf mich ufpasst, so das s Mami und de Papi in Usgang händ chöne. Ich bin natürlich wieder ganz en liebe gsi.
Dä Papi hätmer am 24.01.2023 s erstmal en Schoppe ge und de Grosstädä den en Tag später. So hät mis Mami au mal wider chli Ziit für sich gha.
Das ich gsund blibe, bin ich am 07.02.2023 s erstmal gimpft worde. Wäg de Sprütze hani zersch churz müse brüele, sisch den aber glii wider guet gsii. Defür hani nacher ganz vill pfuuset.
S Wuchenänd vom 18./19.02.2023 isch ganz es speziells gsi. S Mami und de Papi sind mit Fründe uf Davos und ich han defe mitem Grossmueti diheime blibe. Das isch s erstmal gsi, woni e Nacht ohni mini Eltere verbracht han. Mitem Grossmueti isches aber mega lässig! Mir sind vill go spatziere, händ zäme gspillt und sind no de Grossäti go psueche.
In Urmein hät dä Grosstädä es Feriehuus. vom 10.-12.03.2023 bin ich s erstmal dete gsi. Es hätmer aso schüli guet gfalle. Ide Nacht häts sogar no 40cm gschneit.
Am 27.03.2023 hät min Ungle ghüratet. Ich han richtig freud gha, hani däfe a dem Fäscht debi sii.
Ez wonich doch scho vier Mönet alt bin, hani am 04.04.2023 au s erstmal anen Hockeymatch däfe ga. Es isch de Playoff Halbfinal zwüsched Genf und Zug gsi. Natürlich hät Gänf 2:1 gunne. Ich muss aber zuege, dasi nach de Helfti vom Match ipfuuset bin.
Mitem Mami und de Nika binich am 05.04.2023 s erstmal im Ussland gsi. Mir händ en Tagesusflug uf Annecy und Lyon gmacht.
Dä Papi hätmer am 07.04.2023 s erstmal Brei gfüeteret. Es hät Öpfel gä. Au wenn de no chli schwirig isch zum ässe, hanichen sehr gern gha.
Am 11.04.2023 hanich den au s erstmal Gaggi und Bisi uf de Hafe gmacht.
Sitem 28.04.2023 chan ich mich eleige vom Buch uf de Rugge dreie. am 02.05.2023 hani den au no glernt, wie mer sich vom Rugge uf de Buch treit.
Am 29.04.2023 bin ich s erstmal imene Flugzüg gfloge. Mir sind mit de ganze Familie mit Helvetic Airways uf Sylt gfloge und händ det es Wuchenend verbracht. Ich han aso garkei schiss gha!
Am 20.05.2023 hani s erstmal eleige usswerts gschlafe. Ich bin zum Grossmueti hei und han defe di ganzi Nacht dete blibe. Büm Grossmueti isches immer lässig.
Vom 26.05.2023 bis am 29.05.2023 simmer s erstemal go Campe. Mir sind mit de ganze Familie as Döschwo-Pfingstträffe is Wallis. Ich han mitem Mami und em Papi im Zält gschlafe. Ide Nacht isches aso echli chalt worde. Will ich so warm agleit gsi bin, hani aber trozdem guet pfuuset.
Ez wo ich scho gross bin, def ich amel au scho mitässe. am 27.06.2023 han ich drum s erstmal däfe annere Brotrinde nuggele, ich find das aso uu fein.
Ich trinke sehr gern usem Schoppe, drum binich am 14.07.2023 s allerletschte mal gstillt worde.
Sitem 17.07.2023 chan ich ez au ganz eleige sitze.
Will ich mittlerwile scho so aktiv unterwägs bin, schlaf ich sit em 21.07.2023 nüme im Stubewage. S Mami hätmer es grosses Bett bout, det drinn fühl ich mich richtig wohl.
Das ich wider ganz en hübsche bin, hättmer s Mami am 06.08.2023 s erstmal d Haare gschnitte. Das hani aso garnöd lässig gfunde.
Am 10.08.2023 bini s erstmal devokroche. Sit dem Tag chani au sälber ufsitze.
Am 08.09.2023 simmer mit de Tschona an Grifesee gange. Den bini au s erstemal im See go bädele, s Wasser isch zwar nöd ganz so warm gsi, das hät mich aber garnöd gstört.
Mini Taufi isch am 15.10.2023 gsi. Das isch en sehr beidruckende Tag gsi für mich. Zersch bini ide Chile vom Pfarrer tauft worde und nacher simmer ide Sänfmüli no go fiire. Ich han au ganz villi lässigi gschänkli becho.
Damit ich gli alles chan verbiise, isch am 29.10.2023 min erste Zah gwachse. Am 12.11.2023 han ich drum au s erstmal müse Zähbutze, das ischmer aso nonig ganz ghüür.
Am 04.12.2023 bin ich scho 1 worde. Mir hnd es Fästli im Huus vom Grossätti gfiiret. Ich han freud dra gha, das so vill lüüt verbicho sind zum mir gratuliere.
Woni 13 Mönet alt worde bin, am 04.01.2024, hani mis erste Wort gseit. Und zwar das vo mim absolute Lieblingsspilzüüg. Wenni ez O-Toto rüefe, wüssed alli dasi es Auto meine.